Məlahət Abdullayeva
Azərbaycan Dövlət Pedaqoji Universiteti, 
Riyaziyyat fakültəsi, Riyaziyyat və onun tədrisi texnologiyası kafedrasının dosenti,
"Heydər Əliyev-100" media mükafatı laureatı  

Azərbaycan Respublikasının Prezidenti İlham Əliyevin doğum günü müasir dövlətçilik tariximizin əsas mərhələlərini yenidən dəyərləndirmək baxımından xüsusi əhəmiyyət daşıyır. Onun rəhbərliyi ilə Azərbaycan son illərdə siyasi sabitliyi möhkəmləndirmiş, iqtisadi inkişafın davamlı modelini formalaşdırmış və beynəlxalq müstəvidə nüfuzunu əhəmiyyətli dərəcədə artırmışdır. Prezident İlham Əliyevin fəaliyyətində milli maraqlara əsaslanan, reallığa söykənən və uzunmüddətli strateji hədəfləri nəzərə alan idarəçilik xətti aydın şəkildə müşahidə olunur.

Prezident İlham Əliyevin rəhbərliyi dövründə həyata keçirilən iqtisadi islahatlar neft gəlirlərinin səmərəli idarə olunmasına, qeyri-neft sektorunun inkişafına, regionların sosial-iqtisadi dirçəlişinə real töhfələr vermişdir. Müasir infrastruktur layihələri, yeni sənaye və kənd təsərrüfatı zonalarının yaradılması, sosial proqramların genişləndirilməsi əhalinin rifah səviyyəsinin yüksəldilməsinə xidmət etmişdir. Eyni zamanda, təhsil və elm sahəsində aparılan islahatlar insan kapitalının inkişafını prioritet istiqamət kimi ön plana çıxarmışdır.

Prezident İlham Əliyevin siyasi iradəsi və qətiyyətli mövqeyi Azərbaycanın ərazi bütövlüyünün bərpası istiqamətində həlledici rol oynamışdır. Bu tarixi nailiyyət hərbi-siyasi uğur olmaqla bərabər, eyni zamanda milli birliyin, güclü dövlət idarəçiliyinin və düzgün strateji qərarların nəticəsidir. Azad edilmiş ərazilərdə aparılan bərpa və yenidənqurma işləri ölkənin gələcək inkişaf perspektivlərini daha da genişləndirir.

Prezident İlham Əliyevin fəaliyyəti müasir çağırışlara cavab verən, milli dəyərlərə söykənən və xalqın mənafeyini əsas götürən liderlik nümunəsi kimi qiymətləndirilir. Doğum günü münasibətilə dövlət başçısına möhkəm cansağlığı, uzun ömür və Azərbaycanın daha da güclənməsi naminə həyata keçirdiyi məsuliyyətli fəaliyyətində davamlı uğurlar arzulayırıq! 

Doğum gününüz mübarək, cənab Prezident!