SON XƏBƏRLƏR
MƏMMƏDOVA GÜNƏŞ HÜMMƏT QIZIDiamed klinikasının həkim-pediatrı
8 Noyabr – Zəfər bayramının dördüncü ildönümündə Azərbaycan xalqı qürur və ehtiramla qələbələrimizin ən ümdəsini sevinc və fərəhlə qeyd edir. Bu gün bir daha anladıq ki, Şanlı Azərbaycan Ordusu, Müzəffər Ali Baş Komandanımız Prezident İlham Əliyevin rəhbərliyi altında, XXI əsrin müharibəsində tarixi bir qələbə qazandı. Ermənistan ordusu aldığı məğlubiyyətlə üzləşdi. Azərbaycan isə təkbaşına, dünyanın gözü qarşısında BMT qətnamələrini həyata keçirərək haqlı mübarizəsini başa çatdırdı.
İkinci Qarabağ müharibəsində qazanılan parlaq zəfər yalnız bir hərbi uğur deyil, eyni zamanda Azərbaycan Ordusunun qüdrətinin, gücünün və humanistliyinin dünyaya açıq nümayişidir. Bu qələbə bizim qürurumuzu özümüzə qaytardı, bizi qalib xalqa çevirdi və dünyaya göstərdi ki, biz haqqımızı alanda qarşısında heç bir güc dayana bilməz. Prezident İlham Əliyevin illərlə formalaşdırdığı siyasət, diplomatik arenada zərgər dəqiqliyi ilə atdığı addımlar nəticəsində Azərbaycanın haqq səsi dünyanın hər yerində eşidildi, erməni yalanları ifşa olundu.
Bu gün işğaldan azad olunmuş torpaqlarımızda sürətlə gedən bərpa və quruculuq, Qarabağımızın erməni faşistləri tərəfindən viran edilmiş qəlbini Azərbaycanın sülhsevər və humanist dövləti tərəfindən cənnətə çevirməyi hədəfləyir. Qarabağ artıq bizə yalnız torpaq deyil, həm də qələbəmizin və birliyimizin simvoluna çevrilib. Bu qələbə şəhidlərimizin qanı, qazilərimizin əzmi, əsgər və zabitlərimizin qəhrəmanlığı sayəsində mümkün oldu. Prezidentimiz İlham Əliyevin uzaqgörən siyasətinin bəhrəsi olan bu Zəfəri qorumaq, birliyimizi gücləndirmək hər bir Azərbaycan vətəndaşının müqəddəs vəzifəsidir.
Azərbaycan Prezidenti, Müzəffər Ali Baş Komandan İlham Əliyev Vətən müharibəsinin ilk günlərindən etibarən vurğulayırdı ki, "Şuşasız bizim işimiz yarımçıq qalar". Bu sözlər, həm də ölkə rəhbərinin Qarabağa olan sonsuz sevgisinin və Şuşaya olan dərin bağlılığının təcəssümü idi. Vətən müharibəsi boyunca, 44 gün ərzində Azərbaycanın rəşadətli ordusu bir məqsədi uğrunda Şuşaya doğru inamla və durmadan irəlilədi. Hər gün, hər saat, hər an, o arzu reallığa bir addım daha yaxınlaşırdı. Və nəhayət, 8 noyabrda o arzu gerçəkləşdi - Şuşa, 28 il sonra yenidən öz tarixi sahibinə, Azərbaycan xalqına qaytarıldı. Müharibə zamanı, düşmənin mühasirəsində olan Şuşaya doğru irəliləmək, tanklar və digər ağır texnika ilə silahlanmış, strateji nöqteyi-nəzərdən əlverişli mövqelərə yerləşmiş erməni ordusunun qarşısına Azərbaycan əsgərlərinin sadə silahlarla çıxması böyük bir peşəkarlıq və qəhrəmanlıq tələb edirdi. Hər bir döyüşçü, dağlar və qayalar aşaraq, uzun məsafələr qət edərək, bircə məqsəd uğrunda irəliləyirdi: Şuşa. Yolsuzluq şəraitində, fədakarlıqla, şərəflə yerinə yetirilən bu döyüş tapşırığı, həm də müasir dövrün ən böyük hərbi əməliyyatı kimi tarixə düşdü.
Birmənalı şəkildə demək olar ki, Qarabağ Zəfərinin zirvəsi, məhz Şuşa əməliyyatı idi. Zəfərimizin təməlini qoyan, Azərbaycanı bu möhtəşəm nəticəyə çatdıran isə Prezident İlham Əliyev oldu. Ulu öndər Heydər Əliyevin başladığı işi tamamlamaq, onun ideallarını həyata keçirmək, eyni zamanda Ata vəsiyyətini yerinə yetirmək İlham Əliyevin rəhbərliyi ilə reallığa çevrildi. Şuşa əməliyyatı ilə İlham Əliyev Azərbaycanın tarixi qələbəsinin memarı olmaqla, həm də öz adını əbədi olaraq Azərbaycan tarixinə yazdırdı - qüdrətli bir sərkərdə, Müzəffər Ali Baş Komandan kimi. Bu Zəfər də Azərbaycanın qürurunun, iradəsinin və müstəqilliyinin bir simvoluna çevrildi.
Prezident, Müzəffər Ali Baş Komandan İlham Əliyev Şuşanın azad edilməsinin və 8 noyabrın Azərbaycan tarixindəki əvəzolunmaz yerini belə ifadə edir: "Şuşa indi azaddır! Biz Şuşaya qayıtmışıq! Biz bu tarixi qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaq. Bu tarix əbədi yaşayacaq. Bu, bizim şanlı qələbəmizin, zəfərimizin günüdür! Bu qələbəni biz döyüş meydanında qazandıq, danışıqlar masası arxasında yox...". Bu sözlər yalnız bir döyüşün, bir əməliyyatın təntənəsi deyil, həm də bir millətin 28 illik həsrətinin, qürurunun və zəfərinin təcəssümüdür. Şuşa hər bir Azərbaycanlının ürəyində əzab və həsrətlə işğal altında qalan bir simvol olmuşdu. Onun azad edilməsi, sadəcə torpaqların geri qaytarılması deyil, Azərbaycanın ruhunun, tarixinin və mədəniyyətinin bərpasıdır. O, bizim milli qürurumuzun təcəssümü, xalqımızın azadlıq uğrunda apardığı mübarizənin ən böyük nəticəsidir. Şuşa əməliyyatı Azərbaycan əsgərinin yüksək döyüş qabiliyyəti, peşəkarlığı və qəhrəmanlığının ən möhtəşəm nümunəsi oldu. Tanklar və zirehli texnikalarla silahlanmış düşmənə qarşı, yalnız yüngül silahlarla, çətin və əlverişsiz şəraitdə irəliləyən Azərbaycan ordusunun bölmələri "məğlubedilməz erməni ordusu" mifini alt-üst etdi. Hər bir əsgərimiz dağlar aşaraq, çətin yolları geri çevirmədən qət edərək, bu əməliyyatın uğurla başa çatmasını təmin etdi. Şəhidlərimizin və qazilərimizin fədakarlığı, öz həyatlarını və canlarını vətən uğrunda fəda etmələri Azərbaycanın tarixinə əbədi yazılıb. Onlar bu Zəfərin qəhrəmanları, bu tarixdə parlayan ulduzlardır. Hər bir şəhidin adı, hər bir qazinin əzmi, bu Zəfər tarixini əbədi və unudulmaz edib. Onların göstərdikləri hünər, sadəcə döyüş meydanında deyil, bütün dünyaya Azərbaycan xalqının əzmini, iradəsini və qətiyyətini nümayiş etdirdi.
Bu qələbə həm də Azərbaycan xalqının birliyinin, gücünün və azadlıq uğrunda mübarizəsinin simvoludur. 8 Noyabr Azərbaycanın yalnız bir tarixini deyil, həm də gələcək nəsillərə olan borcunu simvollaşdırır. Azərbaycanın Zəfəri, yalnız bu günün deyil, hər bir gələcək nəsilin şərəfli müstəqillik və azadlıq yolunda ilham alacağı bir nümunədir.
Son 21 ildə ölkəmiz yalnız iqtisadi deyil, həm də milli kimlik, qürur və müstəqillik baxımından da böyük bir inkişaf yolu keçib. Azərbaycan xalqı özünü tapıb, öz kimliyini və varlığını yenidən dərk edib. 44 günlük İkinci Qarabağ müharibəsində qazandığımız Zəfər Azərbaycanın tarixi qələbəsi olmaqla yanaşı, həm də milli qürurumuzun təntənəsi oldu. Bu qələbə Azərbaycan xalqının istək və arzularının təcəssümü oldu, eyni zamanda ulu öndər Heydər Əliyevin başlatdığı və Prezident İlham Əliyevin davam etdirdiyi siyasətin doğru yolda olmasının sübutudur.
Prezident İlham Əliyevin rəhbərliyi altında həyata keçirilən bu möhtəşəm uğurlar Heydər Əliyevin qoyduğu təməl üzərində yüksəlir. Prezident İlham Əliyev dəfələrlə vurğulamışdır ki, "Bugünkü Azərbaycan Heydər Əliyevin görmək istədiyi Azərbaycandır". Bu sözlər ölkəmizin güclü bir dövlətə çevrilməsinin, dünya ilə ayaqlaşmasının və xalqın güvən içində yaşamasının rəmzidir. Heydər Əliyevin strateji siyasəti Azərbaycanın dünya siyasətində daha güclü və nüfuzlu bir yer tutmasına səbəb olub.
[email protected]
