52  düymlük ekranı olan televizor, kompüter oyunları, kismerlər, rahat çarpayılar, soyuducu, kondisiner və "Kamasutra" adlı güzgülü otaq.

"Kamasutra" adlı otağa çevrilmiş kamera cinayətkarların yanlarına görüş alaraq gələn arvadları ilə bir araya gəlmələri üçün nəzərdə tutulmuşdu.

İctimaifikir.az Milli.Az-a istinadən bildirir ki, bütün bunlar Hondurasın paytaxtı Tequsiqaopanın yaxınlığındakı Tamara şəhərindəki "Marko Aurelio Soto" həbsxanasında "Mara Salvatruça 13" (MS-13) mütəşəkkil cinayətkar qruplaşmasının üzvləri üçün yaradılmış şərait idi.

Tamara şəhərindəki həbsxanada MS-13-ün 773 mənsubu cəza çəkirdi. Onların kameralarındakı lüks şəraitlə bağlı fotolar sosial şəbəkələrdə yayılandan sonra qalmaqal qopub. Hondurasın DİN-i araşdırmalara başlayıb və həbsxanadakı MS-13 mənsublarının hamısı ölkənin qərbindəki El Parasio vilayətinə, La Tova şəhərindəki "El Pozo 2" həbsxanasına köçürülüb.

Cənubi, Mərkəzi və Şimali Amerikalarda MS-13 ilə "Barrio 18" mafiya təşkilatları arasında amansız qarşıdurma var. Bu qarşıdurma kriminogen baxımdan dünyanın ən təhlükəli ölkələrindən biri sayılan Hondurasda xüsusilə amansız və qanlıdır.

MS-13 və "Barrio 18" qruplaşmaları təqribən 20 il əvvəl ABŞ-ın Los-Anceles şəhərində, əslən Salvadordan olan miqrantlar tərəfindən yaradılıblar.