Türkiyədə terrorun bu şəkildə artmasının arxasında bir səbəb var: Yaxın Şərq münaqişələri. Türkiyə qonşu İraq və Suriyadakı müharibədən bu şəkildə zərbə gördü. Əlbəttə, Türkiyədə daha əvvəl də terror vardı, PKK artıq 30 ildən çoxdur ki, Türkiyə hökumətinə qarşı silahlı terror müharibəsi aparır. Amma son iki ilə qədər terror bu qədər amansız və kütləvi nəticələr doğurmurdu. 

"Ətrafın qətrandırsa, istər-istəməz bulaşacaqsan”. Məşhur məsəldə belə deyilir. Yaxın Şərq alovunun "kösövləri” Türkiyədə də sıçradılır. İstanbulun mərkəzinə 400 kiloqram partlayıcı gətirib polisə qarşı terror edən PKK deyil, ona bu əmri verən güclərdir. 10 il əvvələ qədər PKK gizli fəaliyyət göstərən, dağlarda Türkiyə ordusuna, hökumət qüvvələrinə hücumlar təşkil edən terror təşkilatı idi. Bu isə Türkiyə ilə yanaşı Suriya və İraqda fəaliyyət göstərən, düşərgələri, təlimçiləri, silah tədarükçüləri olan və siyasi təşkilat olaraq qəbul edilən bir PKK var. 

Türkiyəni formal olaraq həm PKK, həm də İŞİD hədəfə alır. Sanki bir növbəlilik yaradıblar. Bir terroru İŞİD törədir, Türkiyəyə qarşı müharibəyə səsləyir, ardınca bir müddətdən sonra eyni hərəkəti PKK törədir. Aydın məsələdir ki, Bu aksiyaların sifarişini verənlər Türkiyəni xaosa sürükləmək, onun sabitliyini, iqtisadi inkişafını zəiflətmək, dövlət orqanlarına, hakimiyyətə inamını sarsıtmaq və beləliklə, nəticədə zəif bir bölgə ölkəsinə çevrilməkdir. 

İstanbul terroru əl-Baba hazırlanan əməliyyata cavabdır. Ancaq bu hadisələrə bəsit bucaqdan baxıb PKK və ya İŞİD deyib bir təşkilatı hədəfə almaq yanlışdır. Terror bir vasitədir, bu səbəbdən də terroru törədənləri deyil, ilk növbədə onu sifariş edən, bu zəmini aradan qaldırmaq lazımdır. Əks halda bu gün PKK adına hər şeyi məhv etsən də, ortaya bir başqası çıxacaq. Çünki xaos hər zaman yoluxucudur.