5 elektron media orqanına girişin məhkəmə qərarı ilə bloklanmasına ABŞ, Britaniya kimi ölkələrdən, həmçinin Avropa Şurasından, digər bir neçə tanınmış beynəlxalq təşkilatdan reaksiyalar gəlməkdədir. Verilən qərarın media azadlığını pozduğu qeyd edilir və Azərbaycandan narazılıq ifadə olunur. Belə görünür ki, Azərbaycan-Qərb münasibətlərində sözügedən məsələ yeni bir soyuqluq yaratmaqdadır. 
Rusiyadan təzyiq xarakterli addımların atıldığı bir vaxtda Qərblə münasibətlərin korlanmasına gətirib çıxara bilən hərəkətlərə yol verilməsi suallar yaradır.

VİP sədri Əli Əliyev hesab edir ki, son dövrlər hakimiyyətin atdığı addımların çox ciddi səbəbləri var. İlk növbədə siyasi müxalifətin cəmiyyətlə təmas imkanlarını məhdudlaşdırırlar: "Referendumdan sonra Azərbaycan yeni siyasi mərhələyə qədəm qoyub. Baş verənləri 2013-cü il hadisələri ilə müqayisə etmək olar. Hakimiyyət köhnə komanda yükündən, eyni zamanda korrupsiya və ətalət ballastından azad olmağa çalışır. 2013-cü ildə bu komanda Kreml və müxalifətin bir hissəsi ilə planı öz xeyrinə dəyişə bildi. Bu dəfə dəyişiklik etmək istəyən tərəf boşluq buraxmaq istəmir. Digər səbəb dayanıqsız dönəmdə nəzarət edə bilmədiyi resursları qapamaqla siyasi müxalifəti zəiflədir. Qərbin narazılıq tonunda olan mövqeyi növbətçi hədə pozasından başqa bir şey deyil. Qərb bununla dəyərlərinə sahiblənir. Qərbin həlledici dərəcədə əsəbiliyindən danışmaq üçün əsaslar yoxdur. Azərbaycan uğrunda yeni savaş başlayıb. İxtisaslaşmış tərəflər, bu halda siyasi kəsim ayıq olmalıdır”.