Deyir bir dəfə Mussolini hakimiyyətdə olan vaxt İtaliya səfiri gəlir Atatürkün qəbuluna. Söhbət zamanı səfir nəsə çaşır, deyir gərək İzmir limanını (ya da Antalyanı - dəqiq bilmirəm, həm də şəhərin hansı olması böyük önəm daşımır) bizə qaytarasınız, ora İtaliyanın olub vaxtilə. Atatürk qaqaşa bir az baxır, deyir sən canın bir dəqiqə gözlə, gəlirəm. Keçir o biri otağa, hərbi formasını geyinir, gəlir oturur. Deyir, hə, qaqa, bayaq nəsə deyirdin elə bil. Səfir deyir, əşşi, özümün də yadımda deyil nə danışırdım, fikir verməginən. Az sonra şələ-küləsini yığışdırıb cırır aradan.

Bunu niyə yazdım? Orta məktəbdə 8-ci sinifdə oxuyan şagird təzəlikcə mənə deyir ki, sən Nüsrəti tanıyırsan? Dedim hansı Nüsrət? Şair? Məlum oldu yox, o deyilmiş. Bir Nüsrət adlı adam varmış, Türkiyədə yaşayırmış, əlini əcaib formada tutub duz səpirmiş. Sosial şəbəkələrin, internetin Türkiyə və Azərbaycan sektorunda xeyli dərəcədə məşhur imiş. Axtarıb bir videosuna baxdım, ətim töküldü. Ancaq 1 milyona yaxın adam izləmişdi! (Ümid edirəm o 1 milyon da mənim kimi "axı buna maraq niyə yaranıb” deyə axtaranlardan ibarətdir). Nüsrət İstanbulda hansısa restoran işlədirmiş, qəssablıq və ət bişirmə "sənətinin” sirlərini öyrənmək üçün Argentinaya qədər gedibmiş və sairə - nüsrətsevərlərin izahından belə məlum olurdu.

Bax, Türkiyə ilə münasibətlərdə gəldiyimiz acınacaqlı nöqtə budur: Atatürkə görə tanıdığımız, hörmət bəslədiyimiz ikinci dövlətimizi bu gün qəssab Nüsrətin duz səpməsinə görə bəyənirik. Təbii ki, necə deyərlər, "bizim vaxtımızın” da öz nüsrətləri var idi. İbrahimin kinoları, Küçük Əmrahın mahnıları... Ancaq hər halda, səviyyə ətə şapalaq vurub qızardana gülmək qədər düşük deyildi. Hər kəs işinin ustası ola bilər, buna sözümüz yoxdur, ancaq qəssablıq və dana ətini qızartmaq belə böyük sənətkarlıq tələb edirsə, Qarabağ və ətrafındakı rayonlardan onlarla super kababçı tapıb ortaya qoyarıq, Nüsrətin özünü şişə taxıb qızardarlar. Hələ söz tapmayanda "Nüsrət steyk bişirməyin sirlərini öyrənmək üçün Argentinaya gedib, bir müddət orda yaşayıb” sözlərini elə dəbdəbə, təmtəraqla yazırlar ki, adamın əli üzündə qalır. Sanarsan Nüsrət Fernando Magellanın "Trinidad” gəmisi ilə tarixdə birinci dəniz dünya səyahətinə çıxaraq Cənubi Amerikanı fırlanıb Atlantik okeanı Sakit okeanla birləşdirən boğazı ilk dəfə tapıbdır. İndi o boğaza da Magellan yox, Nüsrət boğazı deyilir.

Səyahət demişkən, keçək ayrı temaya. Amerikalı biznesmen İlon Mask təzəlikcə Aya turist səfərinin qiymətini açıqladı. 2 nəfər adları çəkilməyən turistlər artıq yerləri bron ediblərmiş, 2018-ci ildə Aya uçacaqlar. Hər biri bu səyahət üçün 150 milyon dollar ödəyibdir.

Məncə, bu ədalətsizcəsinə ucuz qiymətdir. Bizdə 150 milyon dollara 14 kilometrlik aeroport yolunu çəkən oğlanlar vardı, hətta bundan artıq çıxmışdı, deyəsən, indi yadıma gəlmir. Yada salmaq da lazım deyil - bunlar yeyib doyublar, guya başqası gəlsə nə edəcək?

O cümlədən keçmiş nazirin dalıyca danışmaq kimi çıxmasın (ata sözü var, gərək ölünün və nazirin arxasınca ancaq yaxşı söz deyəsən), Ziya müəllim nəqliyyat naziri olanda Bakı avtovağzalını 300 milyon dollardan baha qiymətə tikmişdi. Özü də elə bərbad yerdə tikmişdir ki, hələ də o zırıltı bina bir işə yaramır. Orasını yamayırlar, burası uçur, dalını tuturlar, qabağı qaçır və sairə. Hazırda yenə bina təmir olunur, üstünün şüşələrini söküb şifer vururlar. Sonra saxsı kirəmitlə, lap axırda qamışla örtəcəklər, baxarsınız.

Ancaq bir məsələ də var ki, bizim avtovağzalın binasına hələ girmək olur, hətta istəsən "peraşki” alarsan, ancaq İlon müəllimin Aya göndərdiyi turistlər ora enmək imkanından məhrumdur. Deyir ancaq Ayın orbitində bir "kruq” vurub qayıdacaqlar, Ayın səthinə isə hardasa 100 kilometr hündürlükdən tamaşa edəcəklər. Ta nə oldu? Mən getmirəm. 
Ümid edirəm adlarının gizli qalmasını istəyən o 2 turist də azərbaycanlı məmurlar və onların ailə üzvlərindən kimsə deyildir. Çünki açıqlamada həmin 2 nəfərin bir-birini yaxşı tanıdığı yazılmışdı, açığı, bu mənə nəsə şübhəli gəldi. Görərsiniz, axırda bizimkilərdən kimsə çıxacaq. Biz əsl müsəlman kimi Aya böyük hörmət bəsləyirik. Həmişə görəndə salavat çeviririk. Bəs necə, siz heç Saturna, Yupiterə, canım sənə desin, Halley kometinə salavat çevirən görmüsünüz? Lazım gəlsə biz İslam Həmrəyliyi Oyunlarından dərhal sonra Ay Oyunları idman turniri də keçirdərik.

İndi söz Nüsrətindir... üzr istəyirəm, əlaqədar təşkilatlarındır: gəlin bu yazıya duz səpin.