SON XƏBƏRLƏR
Aynur AllahyarqızıAzərbaycan Dövlət Neft və Sənaye Universitetinin nəzdində
Sənaye və Texnologiya Kolleci “Dillər “ kafedrasınən müəllimi
Tanrı verən ömrü hər kəs bir cür, kimi özü üçün, kimi doğmaları və əzizləri üçün, kimi isə milləti, xalqı, vətəni və dövləti üçün yaşayır. Azərbaycan xalqının ümummilli lideri Heydər Əliyev öz mənalı və zəngin ömrünü bütövlükdə millətinə, xalqına, vətəninə və dövlətinə həsr etmişdir. Millətini canından artıq sevən ulu öndərə olan sonsuz xalq məhəbbətinin sirri də məhz elə budur. Viktor Mari Hüqo demişdir: “Əsl insanın vəzifəsinin yarısı vətənə, digər yarısı da xalqa xidmət etməkdən ibarətdir.”. Tükənməz millət sevgisinin nəticəsidir ki, müstəsna xidmətləri ilə Azərbaycanın taleyində misilsiz rolu olan, müstəqilliyimizin müəllifi və müasir dövlətimizin memarı, ölkəmizi sürətli inkişaf yoluna çıxarmaqla dünya birliyinə qovuşdurmuş dünya şöhrətli nəhəng siyasətçi-Heydər Əliyevin doğum günü hər il respublikamızda, eləcə də onun hüdudlarından çox-çox uzaqlarda böyük təntənə ilə qeyd olunur, əbədiyaşar liderimizin parlaq xatirəsi dərin ehtiramla yad edilir.
Ümummilli lider Heydər Əliyev Azərbaycanın tarixində ən çətin və böhranlı dövrlərdə ölkəmizi idarə etməyə başlayıb və xilaskarlıq missiyasını yerinə yetirib. 1993-cü ildə vətəndaş müharibəsi və daxili siyasi qarşıdurmaların kəskinləşdiyi bir vaxtda xalqın tələbi ilə Bakıya qayıdan Heydər Əliyev qısa müddət ərzində stabillik və təhlükəsizliyi təmin etdi. Onun rəhbərliyi altında hüquqi və iqtisadi islahatlar həyata keçirildi, dövlətçiliyin əsasları möhkəmləndirildi. Heydər Əliyevin uzaqgörən siyasəti nəticəsində müasir Azərbaycan dövlətinin təməli qoyuldu və onun inkişafı üçün böyük səylər göstərildi.
Heydər Əliyevin böyüklüyü onun yalnız bir lider kimi deyil, həm də insan kimi Azərbaycan xalqına göstərdiyi xidmətlərlə ölçülür. Onun vətən sevgisi və xalqının xoşbəxt gələcəyi naminə gördüyü böyük işlər xalqın yaddaşında əbədi olaraq yaşayacaq.
Heydər Əliyev hakimiyyətə gəldikdən sonra ölkədə siyasi sabitlik təmin edildi. Dövlət qurumlarının fəaliyyəti yenidən quruldu və dövlətçiliyin əsasları möhkəmləndirildi. O, Azərbaycan xalqını birləşdirərək, ölkədəki vətəndaş müharibəsi təhlükəsini aradan qaldırdı.
1994-cü ildə imzalanan "Əsrin müqaviləsi" Azərbaycan neftinin dünya bazarına çıxarılmasını təmin etdi və ölkəyə böyük iqtisadi gəlir gətirdi. Bu müqavilə Azərbaycanın iqtisadi inkişafında və beynəlxalq aləmdə nüfuzunun artmasında mühüm rol oynadı. Bundan başqa, ölkəmizdə genişmiqyaslı iqtisadi islahatlar həyata keçirildi. Özəlləşdirmə prosesi başlandı, bazar iqtisadiyyatı prinsipləri tətbiq olundu və xarici investisiyalar üçün əlverişli şərait yaradıldı. Bu islahatlar, Azərbaycanın iqtisadi potensialının artırılmasına və davamlı inkişafına töhfə verdi.
1995-ci ildə ulu öndərin təşəbbüsü ilə Azərbaycanın yeni Konstitusiyası qəbul edildi. Bu Konstitusiya ölkənin demokratik inkişaf yolunda atılan mühüm addımlardan biri oldu, eləcə də dövlət idarəetmə sisteminin hüquqi əsaslarını möhkəmləndirdi.
Heydər Əliyev dühası Azərbaycanın xarici siyasətində böyük uğurlar əldə edib. O, ölkənin beynəlxalq təşkilatlarla əməkdaşlığını gücləndirib, qonşu ölkələrlə münasibətləri normallaşdırıb və Azərbaycanın maraqlarını beynəlxalq arenada yüksək səviyyədə müdafiə edib. Onun təşəbbüsü ilə Azərbaycan Avropa və Asiya arasında bir körpü rolunu oynamağa başlayıb.
Heydər Əliyevin rəhbərliyi altında Azərbaycan Milli Ordusunun qurulması və gücləndirilməsi istiqamətində mühüm addımlar atılıb. Onun təşəbbüsü ilə ordu peşəkar hərbi xidmətçilərlə komplektləşdirilib və müdafiə potensialı artırılıb. O, milli mədəniyyətin inkişafına xüsusi diqqət yetirərək, Azərbaycan xalqının zəngin mədəni irsinin qorunub-saxlanılmasına və təbliğinə böyük əhəmiyyət verib. Təhsil sahəsində isə müasir məktəblərin tikintisi və ali təhsil müəssisələrinin beynəlxalq səviyyəyə çatdırılması istiqamətində geniş işlər görülüb.
Onun uzaqgörən siyasəti və qətiyyətli addımları Azərbaycanın müstəqilliyinin möhkəmləndirilməsində və beynəlxalq arenada mövqeyinin gücləndirilməsində həlledici rol oynayıb. Heydər Əliyevin irsi və onun ölkəsi üçün gördüyü böyük işlər Azərbaycanın parlaq gələcəyinin təminatıdır.
Ümummilli liderin zəngin və çoxşaxəli fəaliyyətinin prioritet istiqamətlərindən birini də Azərbaycanın təhlükəsiz gələcəyinə təminat, müstəqilliyinə zəmanət verən ordu quruculuğu təşkil edirdi. Azərbaycan Xalq Cümhuriyyətinin süqutundan sonra ölkəmizdə bu sahədə yaranmış tənəzzül, ulu öndərin birinci dəfə hakimiyyətə gəlişindən sonra aradan qaldırıldı. Azərbaycanda SSRİ müdafiə sənayesinin on bir böyük zavodunun tikilməsi, bu zavodlarda o dövrün ən müasir texnologiyalarının tətbiq olunması Azərbaycan Respublikasının müdafiə sənayesi istehsalında keyfiyyətli məhsulların həcmini dəfələrlə artırırdı ki, bu da müstəqilliyə doğru gedən yolda vacib amillərdən idi. Bununla yanaşı, milli hərbi kadrların hazırlanması prosesi də vüsət aldı. Müxtəlif sahələrdə, o cümlədən hərbi sahədə ixtisaslı milli mütəxəssislərin hazırlanması istiqamətində Heydər Əliyevin gördüyü böyük işlər bu müdrik şəxsiyyətin uzaqgörənliyinin parlaq sübutu idi. Ordu qururculuğunda keyfiyyətli hərbi təhsilin formalaşdırılmasının və ixtisaslı gənc hərbi kadrların hazırlanmasının son dərəcə strateji əhəmiyyətli məsələ olduğunu hər zaman vurğulayan ulu öndər, bu sahəni də daim diqqət mərkəzində saxlayırdı. Qeyd olunan məsələnin vacibliyini nəzərə alan ümummilli lider Heydər Əliyev hələ Sovetlər dönəmində, SSRİ-nin iflas təhlükəsi heç kimin ağılına gəlmədiyi bir vaxtda milli kadrların, xüsusilə peşəkar hərbçilərin hazırlanması istiqamətində misilsiz işlər görürdü. Belə ki, o, azərbaycanlı gənclərin hərtərəfli formalaşması üçün onların ali təhsil, o cümlədən xaricdə təhsil almalarına xüsusi önəm verməklə yüzlərlə şəxsin müxtəlif dövlətlərin ali təhsil müəsissələrində, həmçinin ali hərbi məktəblərində təhsil almaları istiqamətində əməli tədbirlər həyata keçirirdi. Bununla da, ümummilli liderin şəxsi müdaxiləsi və qayğısı ilə ötən əsrin 70-ci illərindən başlayaraq ali hərbi məktəblərə qəbul olunan gənclərin sırasında azərbaycanlıların sayı intensiv şəkildə artmağa başladı və bu sahədə də milliləşdirmə prosesi sürətləndi. Digər istiqamət isə ölkə daxilində milli təhsil müəsissələrinin təkmilləşdirilməsi və yeni təhsil ocaqlarının yaradılması idi. Müttəfiq respublikalar arasında ilk dəfə və yalnız Bakıda hərbi məktəbin açılmasına mərkəzi hakimiyyətdən icazə almaq çox çətin olsa da, ulu öndər buna nail oldu və məhz onun əzmi sayəsində 19 iyul 1971-ci il tarixdə Silahlı Qüvvələrin peşəkar milli hərbçi heyəti ilə komplektləşdirilməsində müstəsna əhəmiyyəti olan Cəmşid Naxçıvanski adına Hərbi Lisey yaradıldı. Sözügedən hərbi məktəbin fəaliyyətə başlaması Azərbaycanda hərb sahəsinə marağın daha da güclənməsinə böyük təkan verdi.
Böyük şəxsiyyət Heydər Əliyev növbəti dəfə Azərbaycana rəhbərlik etdiyi dövrdə ölkəmizdə bütün sahələrdə olduğu kimi, ordu quruculuğunda da köklü islahatlar həyata keçirildi. Silahlı Qüvvələrin beynəlxalq əlaqələrinin genişləndirilməsini də hər zaman diqqətində saxlayan Ali Baş Komandan Heydər Əliyev, onu müasirləşdirmək üçün sovet hərb sistemini dəyişib, NATO standartlarını tətbiq etməyin zəruriliyini, Şimali Atlantika Alyansının isə beynəlxalq münasibətlər sistemində yeri və rolunu nəzərə alaraq, ölkəmizin NATO-nun “Sülh naminə tərəfdaşlıq” proqramına qoşulması barədə qətiyyətli qərar verdi və 4 may 1994-cü ildə Brüsseldə təşkilatın çərçivə sazişini imzaladı. Bundan sonra, digər ölkələrin qanunvericiliyindən və təcrübəsindən bəhrələnilməklə, eləcə də hərb tariximizə əsaslanılmaqla mükəmməl hərbi qanunvericilik bazası yaradılması prosesi başladı, həyata keçirilən mühüm tədbirlər sayəsində çağırış və səfərbərlik işi də xeyli təkmilləşdirildi, həmçinin hərbi hissələrdə intizam möhkəmləndi və qanunun aliliyi prinsipi bərqərar oldu. Bununla da, görülən işlər qısa zamanda öz bəhrəsini verdi və Azərbaycanın qüdrətli ordusu formalaşmağa başladı.
Əsası ulu öndər Heydər Əliyev tərəfindən qoyulmuş və onun layiqli davamçısı möhtərəm Prezidentimiz cənab İlham Əliyevin uğurla davam etdirdiyi ordu quruculuğu sahəsində həyata keçirilən köklü islahatların və kompleks tədbirlərin nəticəsi olaraq Silahlı Qüvvələrimizin maddi-texniki bazası möhkəmləndirilmiş, arsenalı ən müasir silah-sursat və hərbi texnika ilə zənginləşdirilmiş, hərbi qulluqçuların nəzəri və peşə bilikləri, mənəvi-psixoloji hazırlığı artırılmış, bir sözlə müasir tələblərə tam cavab verən, istənilən döyüş tapşırığını ən yüksək səviyyədə yerinə yetirməyə qadir və işğal altındakı torpaqlarımızı azad etməyə hər an hazır olan Azərbaycan Silahlı Qüvvələri formalaşmışdır. Təsadüfi deyildir ki, “Global Firepower” təşkilatının dünya ölkələri ordularının gücü ilə bağlı hazırladığı son hesabatda Gürcüstan 85-ci, Ermənistan 96-cı sırada qərarlaşdığı halda, ordumuz 52-ci yeri tutmuşdur. Bu isə Azərbaycan Ordusunun Cənubi Qafqazın ən güclü ordusu olduğunu bir daha təsdiq etmişdir. Hərbi qulluqçuların xidmət şəraitinin müasirləşdirilməsi, əsgərlərin məişət işlərindən azad edilməsi, yüksək tələblərə cavab verən əsgər yataqxanalarının istifadəyə verilməsi, hər cür infrastrukturu olan hərbi şəhərciklərin tikilməsi, hərbi qulluqçuların sosial məsələlərinin həlli, əmək haqlarının davamlı olaraq artırılması, verilən imtiyaz və güzəştlərin miqyasının genişləndirilməsi, həmçinin onların ailə üzvlərinin sosial müdafiəsinin gücləndirilməsi, mənzil-məişət problemlərinin həlli bir daha sübut edir ki, həyatını Vətəni müdafiə etmək kimi şərəfli peşəyə həsr edən hərbi qulluqçular eyni zamanda hərtərəfli dövlət qayğısı ilə əhatə olunublar. Bütün bunların nəticəsində, Silahlı Qüvvələrdə nizam-intizam daha da möhkəmlənmiş və son dövrlər hərbi qulluqçular tərəfindən törədilən cinayətlərin, o cümlədən hərbi xidmət əleyhinə olan cinayətlərin sayı əhəmiyyətli dərəcədə azalmış, fərarilik, həmçinin hərbi hissəni və ya xidmət yerini döyüş şəraitində özbaşına tərk etmə cinayətlərinin kökü isə demək olar ki, kəsilmişdir.
Böyük iftixar hissi ilə vurğulamalıyıq ki, ordumuz öz gücü və qüdrətini 2016-cı ilin “aprel” və 2018-ci ilin “may” döyüşlərində bir daha sübut etdi. Hər iki döyüş əməliyyatlarında Azərbaycan hərbçilərinin göstərdiyi peşəkarlıq və qəhrəmanlıq ordumuzun yüksək döyüş ruhunu və qabiliyyətini, torpaqlarımızı azad etməyə hər an qadir olduğunu və qələbə əzmini əyani nümayiş etdirdi. Bütün bu uğurlar Ali Baş Komandan cənab İlham Əliyevin müdrik siyasətinin və qətiyyətinin, dövlətimizin qüdrətinin, ordumuzun gücünün, hərbi qulluqçularımızın qəhrəmanlığının və xalqımızın mübarizliyinin sıx vəhdətinin nəticəsidir. Ulu öndər deyirdi: “Xalqla ordunun birliyi həm xalqın qüdrətini artırır, həm də ordunu daha qüvvətli edir.”.
12 dekabr Ümummilli Liderin anım günüdür. Daim Azərbaycan xalqının qəlbində yaşayan Heydər Əliyevi böyük hörmət və ehtiramla yad edirik.
11.12.2025
[email protected]
KRİMİNAL
