SON XƏBƏRLƏR
Qəhrəmanova Çinarə Məmməd qızıAzərbaycan Dövlət İqtisad Universitetinin
Azərbaycan dili kafedrasının dosenti
“Qadının gücü, əgər o millətə, mədəniyyətə, insana xidmətlə yoğrulubsa, bu artıq bir şəxsiyyətin deyil, bir xalqın şərəfinə çevrilir.”
Azərbaycanın ictimai-siyasi həyatında xüsusi mövqeyə və nüfuza malik olan Mehriban Arif qızı Əliyeva, müasir dövrün parlaq simalarından biri olaraq yalnız Azərbaycanda deyil, beynəlxalq miqyasda da hörmət və ehtiramla xatırlanır. O, öz fəaliyyəti ilə qadının cəmiyyətdəki roluna yeni baxış, yeni nəfəs gətirmiş, həm incə zəriflik, həm də qətiyyətli liderlik nümunəsi ortaya qoymuşdur.
Doğulduğu gün – Ürəyə toxunan tarix
Mehriban xanım Əliyeva 1964-cü il avqustun 26-da Bakı şəhərində dünyaya göz açmışdır. Uşaqlıqdan intellektual mühitdə böyüməsi, zəngin mənəviyyatla formalaşması onun gələcək həyat yolunun, seçiminin bələdçisi olmuşdur. Gözəlliyin və zəkanın harmoniyası, ailədən aldığı tərbiyə və milli-mənəvi dəyərlərə bağlılıq onun şəxsiyyətində formalaşan əsas sütunlar idi.
Elm və humanizmin vəhdətində yetişən bir lider
Mehriban xanım tibb elminin incəliklərinə dərindən yiyələnmiş, Azərbaycan Tibb Universitetində təhsil aldıqdan sonra elmi fəaliyyətini Moskvada davam etdirmişdir. Onun tibb sahəsindəki uğurları, insan sağlamlığına olan diqqəti sonradan həyata keçirdiyi genişmiqyaslı sosial layihələrdə öz real təcəssümünü tapmışdır.
Lakin həyat onu yalnız elm adamı kimi deyil, eyni zamanda ictimai lider, mədəniyyət diplomatı, humanitar missiya daşıyıcısı kimi yetişdirdi. Mehriban Əliyeva Azərbaycan cəmiyyətinə, xalqına və onun rifahına xidmət etməyi həyatının əsas missiyasına çevirdi.
Heydər Əliyev Fondu – Xeyirxahlığın simvolu
2004-cü ildən etibarən rəhbərlik etdiyi Heydər Əliyev Fondu, bu gün Azərbaycanın sosial-mədəni həyatında əvəzolunmaz bir mərkəzə çevrilmişdir. Fondun fəaliyyəti həm miqyasına, həm də dərinliyinə görə unikal xarakter daşıyır. Onun təşəbbüsü ilə:
• Minlərlə yeni məktəb binası inşa edilmiş, mövcud təhsil müəssisələri əsaslı təmir olunmuş;
• Uşaq bağçaları, sağlamlıq mərkəzləri, incəsənət və mədəniyyət ocaqları yenidən qurulmuş;
• Talassemiya, diabet və autizm kimi xəstəliklərlə mübarizəyə yönələn proqramlar həyata keçirilmiş;
• Qarabağ müharibəsi şəhidlərinin ailələrinə, qazilərə və aztəminatlı ailələrə geniş dəstək göstərilmişdir.
Fondun “Təhsilə dəstək”, “Uşaq evləri və internat məktəblərinin inkişafı”, “Regionların sosial-iqtisadi inkişafına yardım” layihələri ölkənin gələcəyi naminə atılmış ən strateji addımlardan biridir.
Mehriban xanımın rəhbərliyi ilə Fond təkcə yardım edən bir qurum deyil, həm də cəmiyyətin mənəvi dirçəlişinə xidmət edən, xeyirxahlığın, mərhəmətin təcəssümünə çevrilmişdir.
Mədəniyyətin diplomat xanımı
Mehriban xanım Əliyeva Azərbaycan mədəniyyətinin dünyada təbliği sahəsində əsl diplomat kimi fəaliyyət göstərmişdir. 2004-cü ildə UNESCO-nun xoşməramlı səfiri, 2006-cı ildə isə ISESCO-nun xoşməramlı səfiri elan olunması onun beynəlxalq nüfuzunun göstəricisidir. Onun təşəbbüsü ilə Azərbaycan muğamı, aşıq sənəti, xalçaçılıq kimi qədim milli irs nümunələri UNESCO-nun Qeyri-maddi Mədəni İrs Siyahısına daxil edilmişdir.
O, Azərbaycanın dünyada tanınmasına, milli brend kimi təqdim olunmasına böyük töhfə vermişdir. Parisdə, Berlində, Moskvada, Romada, Londonda, Vaşinqtonda və digər mədəniyyət mərkəzlərində təşkil olunan Azərbaycan mədəniyyəti günləri ölkəmizin tanıdılmasına yönəlmiş parlaq diplomatik addımlardır.
Birinci vitse-prezident kimi tarixi missiya
Mehriban Əliyeva 2017-ci ildən etibarən Azərbaycan Respublikasının Birinci vitse-prezidenti vəzifəsini icra edir. Bu yeni mərhələ onun siyasi fəaliyyətini daha da genişləndirdi. O, Prezident İlham Əliyevin rəhbərliyi ilə həyata keçirilən islahatların ön sıralarında dayanaraq, cəmiyyətin sosial rifahının yüksəldilməsinə, əhalinin həssas təbəqələrinin hüquqlarının müdafiəsinə və dövlət-vətəndaş münasibətlərinin möhkəmləndirilməsinə mühüm töhfələr verir.
Mehriban xanımın fəaliyyəti bu vəzifədə həm peşəkar, həm də səmimi insan münasibətinə əsaslanır. Onun xalqla ünsiyyət qurmaq bacarığı, empatiya və dəstək göstərmək istəyi, hər bir vətəndaşın problemini öz şəxsi problemi kimi dəyərləndirməsi onu sadəcə siyasi lider deyil, xalqın ruhuna yaxın bir sima edir.
Azərbaycan qadınının simvolu
Mehriban xanım Əliyeva yalnız siyasi və ictimai lider kimi deyil, həm də müasir Azərbaycan qadınının rəmzinə çevrilmişdir. O, qadının həm ailədə, həm cəmiyyətdə, həm də dövlətdə necə mühüm və əvəzolunmaz rol oynaya biləcəyini öz həyat nümunəsində nümayiş etdirmişdir.
Əsrlər boyu Azərbaycan qadınına xas olan zəriflik, mərhəmət, fədakarlıq və ağıllı idarəçilik kimi xüsusiyyətlər Mehriban xanımın simasında mükəmməl təcəssüm tapmışdır.
19.08.2025
[email protected]
KRİMİNAL
