"Mən müəllim adından yüksək ad tanımıram!”

Ümummilli lider Heydər Əliyev.

Müəllim şam kimidir, özü yanıb tükənərkən ətrafını işıqlandırır!”

Mustafa Kamal Atatürk.

Sevindirici haldır ki, müxtəlif peşələrə, müxtəlif sahələrə diqqət yetirəndə görürük ki, digər xalqlardan bizi fərqləndirən bir üstün cəhət var. Bu üstün cəhət isə təkcə bizim millətə aiddir. Astronomiya elmində ixtiraları ilə bu gün də dünyada öyrənilən Nəsrəddin Tusi mənim xalqımın oğludur, dünya poeziyasının günəşi Nizami Gəncəvi mənim xalqımın oğludur. 14 yaşında hakimiyyətə gələn, böyük dövlət qurucusu olan Şah İsmayıl Xətai mənim xalqımın oğludur. Dünyanın qibtə etdiyi xeyriyyəçi Hacı Zeynalabdin Tağıyev bu xalqın oğludur. İkinci dünya müharibəsində ilk sovet qəhrəmanı İsrafil Məmmədov bu xalqın oğludur, Mübariz İbrahimov, Polad Həşimov və adlarını saymaqla bitməyən qəhrəman oğullar bu xalqın övladlarıdır. Nəhayət, bütün xalqların həsəd apardığı dahi siyasətçi, ümummilli lider Heydər Əliyev Azərbaycan xalqının oğludur. Necə fəxr etməyəsən bu xalqla? Necə qürur duymayasan bu ölkə ilə? Bəli, həqiqətən də qürurverici bir xalqın nümayəndəsiyik! Hz. Əli demişdir: "Mənə bir hərf öyrədənin köləsi olaram”. Bu aspektdən yanaşaraq müqayisə etdiyim mövzulardan biri də Azərbaycan müəllimidir. Əgər bir xalqın bu qədər ziyalısı, dahi şəxsiyyəti varsa, demək onların həyat yoluna öz elm çırağından nur bəxş edən müəllimi var. "Açılan hər məktəb bir həbsxananın bağlanması deməkdir”. (Viktor Hüqo). Bəli, bu xalqın müəllimi də qürurverici və fərqlidir. Nədir bu fərqlilik? Var savadlı şagird yetişdirmək, var savadlı övlad yetişdirmək. Bax, bizim müəllimi fərqləndirən cəhət də məhz budur. Şagirdə valideyn nəvazişi göstərmək bizim müəllimə məxsus olan bir xüsusiyyətdir. Bunun nəticəsidir ki, Azərbaycan xalqında hər zaman müəllimə qarşı böyük ehtiram hissi oyaq olub.
Müəllim intizamının, səliqə-səhmanının, sevgi və qayğısının başladığı, hiss edildiyi ilk ocaqdır bağçalar. Övladımızı əmanət etdiyimiz müəllim və kollektiv heyət isə sanki ailəmizdən biri kimi hər gün təmasda olduğumuz, dogmalaşdığımız insanlar olurlar.

Əməyi, zəhməti, kiçikdən böyüyə hər kəslə səmimi və qayğıkeş münasibəti ilə seçilən, fərqlənən bağçalardandır Binəqədi rayonu 297 saylı uşaq bağçası - Körpələr evinin peşəkar heyəti.  Bağçanın müdiri Afət xanım Kərimova, müdir müavini Esmira müəllimə, Elnarə  müəllimə, Vüsalə müəllimə və digər əməkdaşlar hər biri öz növbəsində himayələrində olan körpələrimizə, məktəbli olmağa hazırlaşan azyaşlılara daim ana qayğısı, nəvazişi ilə yanaşır, onların rahatlığı, həmçinin maariflənməsi istiqamətində daim  çalışır, onlara olan güvən və inam hissini hər zaman dogrulayırlar.

"İctimaifikir.az" xəbər portalı olaraq, məhz bu əziz gündə bu bağçanın rəhbərliyinin və bütün kollektivinin timsalında peşəsini sevərək şərəflə yerinə yetirən, xalqımız, Vətənimiz üçün layiqli övladlar yetişdirməkdə əməyi və əziyyəti olan bütün müəllimləri 5 oktyabr - Beynəlxalq Müəllimlər günü münasibəti ilə ürəkdən təbrik edir, hər birinə can sağlığı, şərəfli işlərində uğurlar arzu edirik!